في الذكرى الأولى لتنصيبه سفيرا لليونسيف للنوايا الحسنة قيس الشيخ نجيب يحتفل مع اليونسيف باليوم العالمي للطفل في سوريا

أحتفل النجم السوري، وسفير اليونسيف للنوايا الحسنة في سوريا قيس الشيخ نجيب باليوم العالمي للطفل في سوريا في فعالية كبرى نظمتها مؤسسة اليونيسيف و جائت هذه الفعالية مع الذكرى الأولى لتنصيب قيس سفيرا لليونيسيف.
و القى قيس كلمة في هذه المناسبة جاء فيها ”

سوريا اليوم قدّام لحظة مفصلية، لحظة بتحمل كتير من التحديات، بس بنفس الوقت بتحمل أمل وفرصة حقيقية لنصنع مستقبل أفضل.

والسؤال اللي لازم يرافقنا بكل خطوة، وبكل قرار منتخذه، هو: أي مستقبل بدنا نتركه لأطفال سوريا؟

لأنه الخيارات والقرارات اللي رح نتخذها اليوم رح تحدد شكل الحياة اللي رح يعيشوها أطفالنا بكرا، والفرص اللي رح تتاح إلهن، والأحلام اللي رح يتمكنوا من تحقيقها.

باليوم العالمي للطفل، بدي أكّد على حقيقة أساسية ما لازم ننساها:

حقوق الأطفال مو منحة منقدّملون ياها، ومو وعود منأجّل تحقيقها لبكرا. هي حقوقهن اليوم، هون وهلأ.

من حق كل طفل إنه يتعلّم، وإنه ينشأ ببيئة آمنة وصحية، ويعيش بكرامة، ويلعب ويكتشف العالم من حوله، ويحلم بمستقبل ما بتحدّه الظروف اللي انولد فيها.

ومن حقه كمان إنه يكون إله صوت، ويلاقي مين يسمعه.

نحنا كأهل وكمجتمع، منقضي كتير من وقتنا عم نحكي عن الأطفال، وعم ناخد القرارات نيابةً عنهون. بس هل سألنا حالنا كم مرة وقفنا فعلاً وسمعنا إلهن؟
لنعرف شو اللي بيخافوا منه، وشو اللي بيسعدهم، وكيف بيتخيّلوا مستقبلهم؟

أطفال سوريا هنن مو مجرد جيل عم ينتظر المستقبل. هنن جزء من حاضرنا، ولازم يكونوا شركاء بصناعة مستقبل بلدهم.

مهنة التمثيل علّمتني إني شوف العالم من خلال عيون الآخرين، وحاول افهم مشاعرهم وأحلامهم ومخاوفهم.

واليوم بتمنّى نحاول كلّاتنا نشوف مستقبل سوريا من خلال عيون أطفالها.

إنه نسأل حالنا، ونحنا عم نشتغل على تعافي بلدنا وإعادة بنائه: شو بيعني هالقرار للطفل؟ هل رح يمنحه فرصة لتعليم أفضل؟ هل رح يجعله أكثر أماناً؟ هل رح يفتح قدّامه باب جديد للأمل والحلم؟

وبهالمناسبة، بدي أتوجّه بكلمات مباشرة لأطفال سوريا ويافعيها وشبابها:

لا تتوقفوا عن الحلم، مهما كانت الطريق صعبة.

لا تترددوا بالتعبير عن أفكاركم، ولا تعتقدوا بيوم من الأيام إن أصواتكم أصغر من إنها تُسمع.

أحلامكم مهمة، وأفكاركم مهمة، وآراؤكم بتستحق إننا نسمعها وناخدها على محمل الجد.

إنتو مو بس أمل سوريا بالمستقبل، إنتو جزء أساسي من قوتها وحياتها.

وبالختام، بدي قول إنه مسؤوليتنا تجاه الأطفال كبيرة،.
لأنه الطفولة ما بتنتظر، والحقوق ما لازم تتأجّل ل حتى تصير الظروف مثالية.

إذا اليوم بدنا نبني سوريا اللي منحلم فيها كلياتنا، فلازم نبدأ بأطفالها، ونحط حقوقهم وكرامتهم جوّا كل قرار منتخذه.

.

وهذا هو المعنى الحقيقي لليوم العالمي للطفل:

يومي. حقوقي. مستقبلي.

شكراً لكم جميعاً.”.

على صعيد أخر يواصل النجم السوري في اسطنبول بتركيا
تصوير مسلسله الجديد “الرحمة” وهو عمل مأخوذ من مسلسل تركي يحمل الاسم نفسه وكان الأصل التركي مكونا من ٤٤ حلقة اما النسخة العربية فمكونة من ٩٠ حلقة.
المسلسل من إخراج مخرج تركي و تكتب النسخة العربية الكاتبة السورية لبنى مشلح ويلعب بطولته النجوم صبا مبارك و قيس الشيخ نجيب و باسم ياخور و ريم كفارنة وأيمن عبد السلام و رولا بقسماتي و رنين مطر و جو طراد و جمال العلي و صباح بركات و جنيد زين الدين.
وكان اخر أعمال قيس المعروضة هو مسلسل النسيان الذي حقق نجاحا كبيرا وقت عرضه.
و تعد تجربة الرحمة عودة للتعاون بين قيس وصبا منذ ١٢ عاما من آخر تعاون بينهما في مسلسل زين.
و هي الثالثة لقيس في الأعمال المقتبسة من أصل تركي بعد مسلسلي ستيليتو و الخائن الذين حققا نجاحا كبيرا وقت عرضهما على النستويين النقدي و الجماهيري.