استغاثت الفنانة راندا البحيري بالشركة المتحدة للخدمات الإعلامية، ونقيب المهن التمثيلية عبر حساباتها على مواقع التواصل الاجتماعي؛ بسبب الحرب التي تتعرض لها في الوسط الفني، ومنعها من العمل طوال السنوات الماضيية وايضا ما تتعرض له من ضرائب جزافية، رغم أنها سددت جميع التزاماتها الضريبية.
حيث كتبت الفنانة راندا البحيري عبرصفحتها الشخصية علي “فيس بوك ” قائلة:” الشركه المتحده للخدمات الإعلامية.. السيد نقيب المهن التمثيلية تحيه طيبه وبعد …
هذا ليس بيان شجب ولا شكوي ولا أي شئ آخر … كل ما في الأمر عرض موضوعي علي حضراتكم.، لقد حوربت بداخل شركات الإنتاج المصرية و تم منعي من العمل بدون إبداء أسباب و، بالفعل بعد اكتر من بروفة لأكتر من عمل و كتر من محاولات لدخولي أعمال فنيه “بلاقي نفسي فجاه اتشالت منها و مش فيها و العمل بيكمل من غيري”.
الكلام ده بيحصل بالظبط بقاله اكتر من ٧ سنوات و بيحاولوا فيه بقالهم اكتر من ١٣ سنه بمساعدة احد الأشخاص خارج المجال الفني.
وليس هذا صلب الموضوع أبداً
أنا بتعرض بقالي اربع سنين دلوقتي لضغط لا يمكن لواحده ست تقدر تتحمله لوحدها.
أنا مشتكتش ولا خليت شكل الفن والفنانين وحش والتزمت الصمت وبقالي سنين بحاول اشتغل في مشاريع وفيه منها اللي ربنا كرمني فيه وفيه منه اللي علشان عدم خبرتي الكبيره انذاك أتنصب علي فيه
يعني بسبب ان مفيش عدل في المنظومة أتنصب علي في فلوس كنت شغاله بيها وجايباها بتعب كبير جدا.
كنت طول عمري شخص ماشي صح جدا فيما يخص الأوراق وحق الدوله و ضرائبي كلها مدفوعه من ٢٠٠٤ يعني بقالي ٢٠ سنه بدفع للضرائب
وأظن لو أنا شخص مش ماشي صح مع الضرائب كان من زمان هتلاقي حد قال راندا مدفعتش او معملتش او كذا وكذا. ومحدش أصلا يقدر يشكك في حبي لبلدي الشديد ووطنيتي وفي نزاهتي الحمدلله رب العالمين.
اكتشفت من فتره انهم حاطين عليّ ضرائب جزافية بالرغم من اني مبشتغلش في التمثيل أصلا
وكل ما اكلم حد في المبني بيقولي اصل الممثلين كلهم حصل معاهم كده مش انتِ بس !!!
طب أنا بتكلم عن نفسي
اتكلمت مرة وأتنين
وكلمت نقيبي السيد اشرف ذكي
و هو أداني نمرة تليفون الاستاذه مها المختصة عن الممثلين امام الهيئه العامة للضرائب بحيث انها تفهمهم وقالي ان الموضوع ده هيخلص
لان الممثلة دي حاليا لا تعمل بالتمثيل
فمش هينفع اننا ندفعها فلوس قديمة هي أصلا دفعتها قبل كده.
و بالمستندات احنا “أنا والمحاسب الضريبي المحترم اللي شغال معايا” دفعنا الفلوس اللي علينا من قبل ٢٠٠٥
كل سنه بندفعها في سنتها
انما .. هم مره واحده.،عايزينك تدفع، ضرائب جزافية هم اللي حسبوها من غير ما يرجعولك
واضطريت في المره الأولي نظراً لحبي لبلدي واحترامي لكيان الفنان المصري وعدم اهتزاز صورته امام المصريين والعرب اني امضي علي رقم كبير جدا مع اني متأكده ان أنا مش المفروض ادفع الكلام ده.
علي وعد منهم و “السيد احمد عبد الغني”ناني هدفع اصل المبلغ ومش هدفع غرامات علي المبلغ ده.
وبالفعل وقفوا غرامات وبقالي كذا سنه بقسط المبلغ ده للضرائب لحد الحمدلله ما خلصته كله.
فوجئت بعد ما المبلغ خلص اولاً بمبني القيمة المضافه بيكلمني عايز يدفعني غرامة بالرغم من انهم وعدوني مفيش غرامات.. و الغرامه دي اكتر من المبلغ نفسه اللي بقسطة بقالي سنتين
ثم اتصال من كذا مأمور “ضرائب عامة” طالبين مني فحص كل سنين العمل اللي اشتغلتها.
افحص ٢٠٠٦ اللي ورقها بقي لونه اصفر ؟؟؟؟؟
و طالبين اني ادفع من ٢٠٠٦ لحد ٢٠٢٤ يعني ١٨ سنه ضرايب أنا دافعاهم أصلا قبل كده.
قولتلهم أنا دفعت ده.. قالولي مينفعش.. قولتلهم ايه هو اللي مينفعش
قالولي اصل احنا واخدين تعليمات ان كل الممثلين يدفعوا أزيد من اللي دفعوه.
قولتلهم التعليمات دي منين ؟؟ محدش رد… قالولي كده كده هتدفعي حتي لو دفعتي قبل كده.
مع الضغط عليّ، اضطريت اني اعمل جلسات مع الضرايب لحد ما كل الناس هناك بقوا يشوفوني يومياً وبجد فيه ناس تعاطفت جدا مع موضوعي لأنهم بالفعل شايفينني دفعت قبل كده.
مختصة الحجز كل يوم بتكلمني “أنا هحجز عليكي”.
أنا اول مره أشوف موظف بيتصل بعميل الساعه ٨ بالليل بعد مواعيد العمل علشان يقوله أنا هحجز عليك
يتم تهديدي يوميا بالحجز علي أموالي بالضرايب مع اني دفعت كل ضرائبي لحد آخر عمل عملته، مع اني لا اعمل مع المتحده ولا غيرها.
السيد نقيب المهن التمثيلية.. الساده المسئولين عن الإنتاج في مصر.. ارحموا الممثل المصري.. ارحمونا
وبجد بجد والله ما بطلب شغل أنا أصلا فقدت الشغف كممثله ومش عايزه أشوف وش الكاميرا دي تاني.
أنا فعلا كل اللي طالباه إنكم تسيبوني في حالي. بس مش اكتر.
يا أسيادنا أنا عايزه اكمل حياتي في مصر
مش عايزه أدور علي شغل برا
و لا عايزه أعيش في حته تانيه ليه مصممين تزقونا كلنا ندور علي حياتنا في حته تانيه.
أنا قاعده هنا.
